SPRITE rasanya nyegerin, No Bokis…! Begitu kata komedian Cah Lontong dalam iklan produk minuman bersoda. Jenis minuman kemasan ini, ngingetin semasa ane masih bocah. Seinget ane sih, waktu itu belum sekolah. Ceritanya, babeh yang hobi ngebun suka ngajakin ane kalo ke kebun, yang jaraknya ada sekiloan dari rumah.
Karena babeh asalnya dari kampung, jadi seberes gawe apalagi kalo libur, udah pasti ngambil cangkul. Ya, apa aje dia tanam. Mulai pohon duren, nangka, rambutan, pokoknya sebangsa pohon buah-buahan.
Babeh bilang, kalo udah berbuah, buat anak sama cucu. Alhamdulillah, pohon buah yang babeh tanem puluhan tahun lalu itu, udah lama bisa dipanen. Cucunya, termasuk anak ane, saban musim buah, pasti pesta buah. Buah favorit udeh pasti duren.
Nah, yang ane mau ceritain, saban istirahat di kebon, maklum di kampung yang lumayan agak gersang, babeh ane udah langganan minta dibeliin minuman botol. Satu-satunya warung yang ada deket kebon, dulu belum ada air mineral sebangsa Aqua, jadi yang ada minuman botol jenis limun.
Di dinding warung, yang paling banyak dipajangin itu botol minuman Sprite Cs, kaya Coca Cola sama Fanta. Yang laen ada juga sih, cuman, babeh ane pasti mintanya Sprite. Ini cerita beneran, kata babeh ane, Sprite aja. Dia seneng karena warnanya bening sama rasanya gak nyenggak, tapi bener nyegerin.
Karena ane masih bocah, tetep aje minum Sprite rasanya nyenggak di tenggorokan. Tapi, emang aslinya ngilangin haus, bikin seger, dan emang no bokis. Kalo ane bandingin sama taun politik sekarang nih, di pinggir-pinggir jalan kita liat banyak bener gambar baliho. Warna warni kaya botol limun di warung deket kebon babeh ane. Hehehe…
Di baliho, pada bederet tuh wajah manis para calon wakil rakyat. Seperti kita tau, di balihonya itu dihiasin sama janji-janji manis, kalo dia caleg pilihan dan pasti oke. Slogan para caleg, kalo dibaca doang sih emang kerasa nyegerin. Tapi bakal tambah nyenengin kalo janji manis itu bukan cuman sekedar janji. Tapi kalo kepilih bener-bener ditepatin.
Jangan sampe yah nyaleg cuman modal janji. Jadi, kalo tepatin tuh janji-janjinya, ane sepakat kalo caleg era milenial ini bener-bener NO BOKIS, beda sama caleg era jadul. Segitu aje dari ane… Salam Polbo…
